Inter Miami ka arritur një sukses historik, duke u kualifikuar për herë të parë në finalen e MLS Cup pas një fitoreje të thellë 5-1 ndaj New York City FC në Chase Stadium.
Kapiteni Lionel Messi ngriti trofeun e kampionëve të Konferencës së Lindjes, ndërsa bashkëpronari i klubit, Jorge Mas, theksoi mesazhin e skuadrës: “Një ndeshje e mbetur, një hap nga trofeu.”
Inter Miami do të jetë vendas në finalen e së shtunës ndaj Vancouver Whitecaps, pasi e mbylli sezonin e rregullt me më shumë pikë.
Trajneri Javier Mascherano u shpreh i lumtur për arritjen historike, por kujtoi se objektivi i madh ende nuk është përfunduar: “Ky është një moment që do mbetet në historinë e klubit, por trofeu final është shpërblimi më i rëndësishëm.”
Tadeo Allende ishte protagonisti kryesor i ndeshjes, duke realizuar tripletë dhe duke çuar Miamin drejt finales. Mateo Silvetti shënoi golin e tretë pas një asistimi fantastik nga Messi, ndërsa Telasco Segovia vulosi fitoren në pjesën e dytë.
Inter Miami ka kaluar një rrugëtim mbresëlënës në këto playoff, duke mposhtur Nashville SC, FC Cincinnati dhe tani New York City FC. Allende, i huazuar nga Celta Vigo, ka qenë lojtari i ndeshjeve të mëdha me tetë gola në fazë, shkruan Gazeta Express.
Në stadium ishin të pranishëm edhe yje të sportit, mes tyre tenisti Carlos Alcaraz dhe pjesëtarë të ekipit kombëtar amerikan të femrave. Miami tani synon trofeun e madh, vetëm një fitore larg historisë.
