Tre lojtarë të Kombëtares shqiptare zbritën në fushë nga minuta e parë sot në sfidën mes Leçes dhe Torinos. Ylber Ramadani dhe Medon Berisha të ekipit vendës përballë Kristjan Asllanit. Ka munguar për shkak dëmtimi lojtari tjetër kuqezi, Adrian Ismajli, pjesë e Torinos.
Kanë festuar në fund Ramadani dhe Berisha, pasi ndeshja përfundoi me fitoren 2-1 të Leçes. Protagonistë ishin të tre kuqezinjtë, ata të Leçes në sensin pozitiv, kurse ai i Torinos në sensin negativ.
Kristjan Asllani kishte shansin të linte shenjë në këtë sfidë, por në minutën e fundit humbi një penallti vendimtare, që mund t’i kishte dhënë pikë skuadrës së tij në këtë transfertë, duke e barazuar rezultatin në 2-2. Gjuajtja e shqiptarit të Torinos u ndal nga portieri Falcone.
Berisha në anën tjetër shkëlqeu në pjesën e parë, duke dhënë pasimet për dy golat e Leçes. Ai krosoi bukur nga goditja e këndit në rastin e golit të parë dhe pas dy minutash pasoi bukur për Banda në rastin e golit të dytë.
Medon Berisha u zëvendësua 7 minuta para përfundimit të kohës së rregullt, ndërsa Ylber Ramadani dhe Kristjan Asllani luajtën deri në fund. Ramadani u ndëshkua me karton të verdhë.
