Vora shumë shpejt do të ketë nga ana e saj edhe faktorin fushë. Pas inspektivmeve të bëra nga kreu i Federatës Shqiptare të Futbollit, i cili u shoqërua nga kryetari i Bashkisë së Vorës në impiantin e ri u konstatua se punimet janë drejt fundit pasi të gjithë aktorët që kanë kontribuar në këtë vepër kanë respketuar afatat e paracaktuara.
Gjatë vizitës, presidenti Duka u shpreh i kënaqur me ritmet e punimeve dhe theksoi rëndësinë e këtij investimi të përbashkët mes FSHF-së dhe Bashkisë Vorë.
“Ky projekt, që në fillim dukej që ishte një projekt shumë i mirë. Është një projekt që nuk ka filluar sot, por ka filluar me kohë, që me fushën që kemi investuar bashkë me Bashkinë e Vorës, me dy tribunat e tjera. Por realisht, tribuna e sotme dhe me të gjithë ambientet që duhen për një stadium të tillë, është me të vërtetë fantastike. Dua ta falënderoj kryetarin për bashkëpunimin dhe gjithashtu edhe klubin dhe Presidentin e Vorës”, u shpreh numri një i Federatës Shqiptare të Futbollit.
Ndërsa kryetari i Bashkisë Vorë, Blerim Shera falënderoi Federatën Shqiptare të Futbollit për mbështetjen e vazhdueshme. “Jo vetëm në realizimin e parë të fushës stërvitore në Ahmetaq, por edhe në projektin e parë të stadiumit. Por kjo që është sot këtu nuk është më, siç e thatë edhe ju, ëndërr. U duk si e vështirë në fillim, por është një realitet që dita-ditës po merr formë dhe mezi presim që vetë klubi dhe të gjithë qytetarët të zhvillojmë ndeshjen e parë hapëse këtu në stadiumin e ri. Shpreh mirënjohjen për bashkëpunimin që kemi bërë deri tani“,tha kryetari i Bashkisë Vorë, Blerim Shera.
