Nga një goditje e madhe në janarin e 2025-ës, në një largim të mundshëm në janarin e 2026-ës. Situata e Santiago Gimenez te Milani po komplikohet dhe, sipas “La Gazzetta dello Sport”, e ardhmja e tij është në dyshim të fortë.
Meksikani nuk luan prej një muaji e gjysmë, nga ndeshja kundër Atalantës. Duhej të ishte java e rikthimit, por sulmuesi vazhdon të stërvitet veç grupit për shkak të problemit në kavilje. Zyrtarisht nuk ka pasur asnjë diagnozë dhe asnjë komunikatë zyrtare nga klubi. Ndalesa ndërkohë vazhdon të zgjatet jashtë parashikimeve, duke vënë në dyshim edhe Superkupën e Italisë.
Situata nuk është vetëm fizike, por edhe psikologjike, duke parë zërat e merkatos, që flasin gjithmonë e më shumë për një largim të mundshëm të tij nga Milani. Janari po vjen dhe Gimenez mund të ndryshojë skuadër.
