Sulmuesi i Kosovës, Fisnik Asllani do të largohet në verë nga Hoffenheimi por jo edhe nga Bundesliga e Gjermanisë.
Asllani me të përfunduar sezoni aktual, pritet të transferohet te Borussia Dortmundi, ekip favorit për shërbimet e tij.
Tërheqja e Bayernit nga gara për Asllanin, duket se i ka dhënë avantazh Dortmundit për sulmuesin kosovar, i cili po preferon qëndrimin në kampionatin gjerman.
23-vjeçari ka kontratë me Hoffenheimin deri në vitin 2029 dhe një klauzolë lirimi në vlerë prej 30 milionë eurosh, të cilën Dormtundi është gati ta paguajë.
Në sezonin e tij të parë në Bundesligë, Asllani ka shënuar 6 gola dhe ka bërë po aq asistime në 20 ndeshje të luajtura deri më tani.
Gjithashtu, Asllani ka tërhequr edhe vëmendjen e ekipeve nga kampionatet tjera, që mbeten në garë për transferimin e tij.
Në mesin e skuadrave që e shohin Asllanin si opsion të mirë për sulmin, janë Barcelona, Juventusi, Tottenhami, Chelsea e Fenerbahçe.
