Kampionia e dyfishtë olimpike e “Milano Cortina 2026”, që u transmetua në RTSH, dorëzohet pas shqetësimeve fizike dhe nuk do të marrë pjesë në finalet e Kupës së Botës.
Ka përfunduar në Soldeu sezoni i shkurtër, por i mrekullueshëm i skiatores Federica Brignone. Fituesja e medaljes së artë në supergjigantin dhe gjigantin e “Milano Cortina 2026”, e rikthyer në pistë me rezultate të jashtëzakonshme pas dëmtimit të rëndë të 3 prillit 2025, ka vendosur të ndalet. Ajo nuk do të marrë pjesë në etapat e ardhshme të Kupës së Botës më 6-8 mars në Val di Fassa, në Are më 14-15 mars dhe finalet e Norvegjisë më 21-25 mars.
“Mendoj se i kam kërkuar shumë trupit tim këto muaj, – ka deklaruar Brignone. – Që ditën kur u dëmtova, iu dedikova vetes me objektivin për të marrë pjesë në Olimpiadën Milano Cortina 2026, ku arrita ta ngre flamurin italian në shkallën më të lartë të podit. Ia dola dhe provova ta vazhdoj sezonin, por tani trupi po më bën llogaritë. Duhet të marr një pushim për t’u rehabilituar plotësisht. Falënderoj të gjithë ata që besuan tek ëndrra olimpike dhe më ngritën në këmbë për këtë sezon”.
Skuadra italiane do të përfaqësohet kështu me Sofia Goggia, Laura Pirovano, Elena Curtoni, Nicol Delago, Nadia Delago, Roberta Melesi, Asja Zenere, Sara Allemand, Sara Thaler dhe Ilaria Ghisalberti në garat e radhës.
