“Tuttosport” bën një panoramë mbi të ardhmen e mbrojtjes bardhezi. Spalletti ka qenë i qartë me klubin, nuk dëshiron profile në zhvillim apo të rinj për t’u formuar gradualisht, pasi të tillë janë tashmë në skuadër dhe trajneri është i kënaqur të punojë me ta. Përkundrazi, kërkohen lojtarë të gatshëm, kampionë të konsoliduar me përvojë ndërkombëtare që të rrisin menjëherë cilësinë teknike dhe personalitetin e ekipit.
Megjithatë, do të ketë një largim. Çifti i mbrojtjes së Juventusit të Spallettit nuk mund të përbëhet nga Gleison Bremer dhe Antonio Rüdiger. Aktualisht, ardhja e njërit përjashton qëndrimin e tjetrit. Kjo pavarësisht situatës kontraktuale të gjermanit, i cili në fund të sezonit mund të largohet falas nga Real Madridi. Trajneri nuk ka dyshime për cilësitë e tij, duke e njohur që nga koha te Roma, por e di se rruga për ta siguruar është bërë më e vështirë.
Ndërkohë, Real Madridi po vlerëson rinovimin e tij. Vendimtar ka qenë mbështetja e Arbeloa, që e vlerëson shumë mbrojtësin dhe dëshiron ta mbajë. Rüdiger, edhe pse i tunduar nga projekti i Spallettit, ka lënë të kuptohet se prioritet mbetet Reali, nëse i ofrohen edhe dy vite kontratë.
