Kjo javë do të jetë e rëndësishme për fatin e skuadrave të Superligës së Kosovës në futboll, sa i përket garave evropiane.
Aktualisht, katër skuadra po e përfaqësojnë Kosovën në raundin e dytë kualifikues të Ligës së Konferencës dhe gjasat janë të mëdha që të gjitha të avancojnë tutje.
Në rast se Drita, Ballkani, Malisheva dhe Dukagjini kalojnë në raundin e tretë kualifikues, atëherë ky do të ishte një sukses i madh për futbollin kosovar pasi do të rriteshin gjasat që të kemi më shumë skuadra në fazën e grupeve.
Pas ndeshjeve të para të raundit të dytë kualifikues, të gjitha ekipet e Kosovës i kanë gjasat e mira për të bërë edhe një hap para.
Pas barazimit 1:1 ndaj Florianas, skuadra e Dritës të martën mbrëma luan ndeshjen e kthimit në Prishtinë dhe vlerësohet favorite për t’u kualifikuar në raundin e tretë.
Dukagjini që pësoi 1:0 në udhëtim te Lugano, të mërkurën nga ora 16:30 në kampin nacional të FFK-së, në Hajvali e luan ndeshjen e kthimit.
Ndërkohë, të enjten luajnë Ballkani dhe Malisheva nga ora 20:00, përkatësisht 21:00.
Ballkani luan në Prishtinë ndaj Bohemiansit, ekip që ndeshjen e parë e fitoi 2:1 kurse Malisheva është mysafire e Hibernianit, të cilin e mposhti 2:0 në duelin e parë.
