Portieri i Real Madrid, Thibaut Courtois, beson se skuadra është gati për fillimin e La Liga, pasi përfundoi përgatitjet parasezonale me një fitore ndaj Schalke. Belgu theksoi qëndrueshmërinë mbrojtëse të ekipit, gjendjen fizike dhe krijimin e rasteve si shenja inkurajuese përpara rikthimit të futbollit konkurrues javën e ardhshme.
“Ishte testi i fundit para se të fillojë La Liga dhe ishte e rëndësishme të luanim një ndeshje të mirë. Mendoj se e bëmë. Ishim shumë të fortë në mbrojtje. Krijuam shumë raste, luajtëm mirë dhe fizikisht mendoj se të gjithë janë në formë të shkëlqyer. Të gjithë punuam mirë dhe kjo është e rëndësishme për të filluar“, tha Courtois.
Courtois theksoi gjendjen shpirtërore brenda skuadrës, ku nuk ka mungesë motivimi: “Jemi shumë të emocionuar. Pas Kupës së Botës, jemi rikthyer në formë pak nga pak, por skuadra është shumë e etur, stërvitet shumë mirë dhe të gjithë duan seriozisht një sezon të shkëlqyer. Shoh shumë angazhim dhe mendoj se kjo është e rëndësishme. Mezi presim të fillojmë.”
“Duhet shumë përqendrim në çdo moment të ndeshjes. Në goditjet nga këndi, goditjet e lira, të gjithë duhet të jenë të përqendruar në çdo sekondë të ndeshjes, duke luajtur mirë dhe seriozisht. Mendoj se kjo është ajo që po bëjmë”, shtoi portieri i “los blancos”.
