Trajneri i Tiranës, Dean Klafuriç ka folur për mediat në prag të sfidës kundër Egnatias, që do të luhet nesër në orën 21:00 në Rrogozhinë dhe do të transmetohet në RTSH. Tekniku ka treguar objektivat e bardhebluve këtë sezon dhe mendon se ecuria e rrogozhinasve në kupat e Europës mund të jetë një avantazh për skuadrën e tij.
“Jemi të lumtur që më në fund kampionati filloi, pasi kemi punuar shumë gjatë përgatitjeve. Po, kemi objektivat tonë. Ne duam të luftojmë për Europën, kjo është ajo që duam të bëjmë.
Kush nuk do të donte të luftonte për titull në Europë? Padyshim. Por ne duhet të jemi realistë, për shkak të asaj që ndodhi në vitin paraardhës dhe atë që po ndodh tani. Por, siç e thashë, objektivi i parë është të sigurojmë Europën dhe më pas, nëse shfaqet mundësia për të fituar diçka tjetër, do të jemi gati për ta bërë.
I kënaqur me skuadrën? Po, jam shumë i lumtur me lojtarët që erdhën, si dhe me të rinjtë që kam gjetur në klub. Mendoj se kemi atmosferë të mirë, shumë të mirë, me eksperiencë dhe përzierje mes eksperiencës dhe të rinjve.
E respektojmë Egnatian, sidomos me çfarë kanë treguar së fundmi. Luajtën shumë mirë në Europë dhe i kemi ndjekur, janë në formë dhe ne nuk jemi ende në formë kompeticioni. Por gjithashtu ndeshjet në Europë kanë lodhur lojtarët fizikisht dhe emocionalisht. Siç e përmendëm, ka avantazhe, por edhe disavantazhe, si gjithmonë”, ka thënë mes të tjerash Klafuriç.
