Rafael Leao është kthyer në një prej figurave më të përfolura në Stamboll, vetëm pak ditë pas transferimit te Galatasaray. Entuziazmi i tifozëve turq është i jashtëzakonshëm, ndërsa fanellat me emrin e yllit portugez po shiten me ritme të frikshme.
Sipas raportimit të La Gazzetta dello Sport, plot 50 mijë fanella të Galatasarayt me emrin e Rafael Leaos dhe numrin 27 janë shitur brenda vetëm tre ditësh.
Një shifër e jashtëzakonshme edhe duke marrë parasysh pasionin e madh të tifozëve turq për futbollin dhe klubin e tyre, përcjell ORAinfo.
Leao u prit si një kampion i vërtetë në Turqi. Rreth 500 tifozë u shfaqën në aeroport për t’i uruar mirëseardhjen, ndërsa videot e publikuara në rrjetet sociale treguan entuziazmin e madh të tyre, me disa tifozë që madje godisnin makinën SUV që transportonte futbollistin portugez.
Edhe në stadium atmosfera ishte elektrizuese. Të shtunën në mbrëmje, Leao mori flamurin e ultrasve të Galatasarayt dhe iu bashkua korit të tifozëve duke thërritur “Cimbom bom”, sloganin e njohur të klubit.
Ende nuk ka ardhur momenti për ta parë Leaon në fushë me fanellën e Galatasarayt, por duket se transferimi në Turqi i ka rikthyer buzëqeshjen dhe entuziazmin portugezit, pas muajve të vështirë te Milani, ku shpesh ishte përballur me kritika dhe kontestime nga tifozët.
Ribashkim me Osimhenin
Një tjetër element që ka tërhequr vëmendjen është ribashkimi i Leaos me Victor Osimhen, me të cilin portugezi ka një marrëdhënie të mirë.
Të dy kanë ndjekur një rrugëtim në disa aspekte të ngjashëm: nga Ligue 1, drejt suksesit në Serie A dhe tani së bashku në Stamboll.
Leao ka pozuar për dhjetëra fotografi me Osimhenin, ndërsa një video ku sulmuesi nigerian falënderon avokatin e Leaos për finalizimin e marrëveshjes ka bërë xhiron e rrjeteve sociale.
Edhe në Milan fanellat e Leaos shiteshin shumë
Fenomeni nuk është i ri për Rafael Leaon. Edhe në Milano, portugezi ishte një prej futbollistëve që shiste më shumë fanella.
Pas fitimit të titullit kampion me Milanin, Leao ishte i treti në renditjen e lojtarëve me fanellat më të shitura, pas Sandro Tonalit dhe Zlatan Ibrahimovic.
Pas largimit të Tonalit drejt Newcastle dhe pensionimit të Ibrahimovic, fanella me numrin 10 u bë ndër më të zakonshmet në rrugët e Milanos.
Tani, në Stamboll, një numër i ri po bëhet simbol i “Leao manias”: 27.
Ky është numri që portugezi ka zgjedhur te Galatasaray, pasi gjatë karrierës së tij ka mbajtur numra të ndryshëm. Te Milani ai luajti me 17 dhe 10, te Lille me 14 dhe 7, ndërsa te Sporting CP me 9 dhe 93.
Tashmë, është radha e numrit 27 që të bëhet një prej fanellave më të kërkuara në Stamboll. /ORAinfo/
