Ish-sulmuesi i Milanit, Alexandre Pato, beson se skuadra aktuale e kuqezinjve ka potencialin për të luftuar seriozisht për titullin kampion në Serie A dhe për t’ia rrëmbyer trofeun rivalëve të Interit.
Milani e ka nisur mjaft mirë sezonin e ri nën drejtimin e Ruben Amorimit, duke regjistruar dy fitore në dy ndeshjet e para. Kuqezinjtë triumfuan fillimisht në transfertë ndaj Torinos, ndërsa më pas mposhtën Venezian në shtëpi.
Kështu, Milani është një nga gjashtë skuadrat që kanë marrë maksimumin e pikëve në dy javët e para të sezonit 2026/27.
Një tjetër skuadër me start perfekt është Juventusi, ndaj të cilit Milani do të përballet të dielën në mbrëmje në Allianz Stadium. Përballjet e sezonit të kaluar mes dy skuadrave përfunduan të dyja me rezultatin 0-0, ndaj këtë herë pritet një spektakël më i madh.
Në ditën e 37-vjetorit të tij, Pato dha një intervistë për “La Gazzetta dello Sport”, ku foli për Milanin dhe përballjen e veçantë me Juventusin, transmeton ORAinfo.
Pato: Juventus-Milan është gjithmonë një ndeshje speciale
“Është një ndeshje e madhe dhe ka qenë gjithmonë kënaqësi ta luaja. Jam përballur disa herë me Juventusin.
Një herë në Torino shënova ndaj Manninger, duke përfituar nga një goditje e Ronaldinhos që ishte bllokuar. Ndërsa në San Siro i dhashë asistin Ronaldinhos, i cili shënoi ndaj Buffonit.
Gigi është një legjendë, një nga portierët më të mëdhenj në historinë e futbollit. Madje e kam vendosur titullar në ‘Dream Team’-in tim në EA Sports FC 27. Të luaja kundër tij ishte një ndjesi speciale.
Të luaje kundër Juventusit do të thoshte gjithashtu të kishe përballë Alessandro Del Pieron, një tjetër kampion, i cili më vonë u bë edhe miku im.”
Pato, i cili pati periudhën më të suksesshme të karrierës pikërisht te Milani, mbetet optimist për skuadrën aktuale dhe beson se kuqezinjtë kanë cilësitë e duhura për të luftuar për Scudetton këtë sezon.
Me një fillim perfekt të kampionatit, Milani tashmë ka dhënë sinjalet e para se mund të jetë një pretendent serioz për titullin. /ORAinfo/
