Pas fitores së thellë 7-0 ndaj Burkina Faso, trajneri Lionel Scaloni analizoi paraqitjen e Argjentinës, duke prekur të ardhmen e “Selección” dhe, mbi të gjitha, trashëgiminë që lë pas Lionel Messi, i cili po i afrohet fundit të rrugëtimit të tij me kombëtaren. Trajneri vlerësoi qëndrimin e skuadrës.
“Pjesa e parë ishte e mirë. E nisëm ndeshjen me seriozitet të madh. Në pjesën e dytë, përmes zëvendësimeve, u dhamë minuta lojtarëve më të rinj dhe atyre që po debutonin. Duhet t’u japim kohën e nevojshme për t’u përshtatur. Në përgjithësi, e arritëm objektivin tonë“, tha Scaloni.
Megjithatë, tema kryesore ishte Messi dhe ajo që kapiteni do t’u lërë brezave të ardhshëm. Scaloni theksoi, mbi të gjitha, shembullin e përditshëm që jep superylli argjentinas: “Trashëgimia e tij është dëshira për të qenë gjithmonë i pranishëm. Ai ishte i pari që mbërrinte dhe i fundit që largohej”.
“Mënyra se si kujdeset për veten, mënyra se si i qaset çdo ndeshjeje, këto janë gjëra që nuk duken nga jashtë, por shokët e skuadrës i shohin dhe ato përfaqësojnë shembullin më të mirë të mundshëm. Ai lë pas diçka të pashoqe“, shtoi trajneri argjentinas.
Më pas, Scaloni foli për dyshen e sulmit të përbërë nga Lautaro Martínez dhe Julián Álvarez, një skemë që trajneri vazhdon ta aplikojë me qëllim krijimin e një harmonie më të madhe mes dy qendërsulmuesve. “Po përpiqemi t’u japim mundësinë Juli dhe Lautaro, të cilët njihen tashmë me njëri-tjetrin, të luajnë së bashku, sepse është një ide shumë konkrete.”
“Të dy janë ‘numra nëntë’ dhe duam që ata të krijojnë mirëkuptim dhe të punojnë së bashku. Kjo është arsyeja pse vazhdojmë t’i aktivizojmë së bashku; mund të rezultojë vërtet e dobishme“, deklaroi Scaloni.
