Tetë paraqitje dhe tashmë pesë asiste: nuk iu desh shumë kohë Anthony Gordon për t’u përshtatur te Barcelona pas transferimit të tij veror nga Newcastle. Megjithatë, në një intervistë për revistën zyrtare të klubit, anglezi thekson se çfarë i mungon ende lojës së tij.
“Më mundon goli. Nuk kam pasur ende shumë raste për të shënuar. Në fakt, kjo është diçka që ka ndodhur gjatë gjithë karrierës sime. Në çdo klub dhe në çdo fazë, më është dashur pak kohë para se të filloja të shënoja rregullisht. Por jam i bindur se do të shënoj shumë gola“, tha anglezi.
Megjithatë, lidhja e menjëhershme me tifozët ishte një surprizë: “Këta tifozë kanë admiruar Messi, Luis Suárez, Ronaldinho dhe shumë nga lojtarët më të mirë në histori. Nuk e prisja të ndihesha kaq i vlerësuar që në fillim. Kur firmosa nuk e besoja se ishte e vërtetë sepse ishte diçka që e kisha ëndërruar që kur isha shumë i vogël”.
Eric Garcia dhe Dani Olmo luajtën një rol kyç në përshtatjen e tij, ndërsa Gordon rezervon lëvdata të veçanta për Pedri: “Gjatë karrierës sime, kam bërë shumë vrapime që askush nuk i shihte, por tani kam Pedri, i cili sheh absolutisht gjithçka.”
Anglezi ka mbetur gjithashtu i impresionuar nga atmosfera: “Është klubi më i mirë në botë, me disa nga lojtarët më të mirë, e megjithatë të gjithë janë shumë modestë. Jemi shumë ambiciozë dhe duam të fitojmë gjithçka, por nuk do të dëgjoni kurrë dikë të mburret së tepërmi.”
Së fundmi, mes trajnerëve me të cilët ka punuar gjatë karrierës së tij, ai veçon Hansi Flick, trajnerin actual te Barcelona: “Ai më dha mundësinë të luaja në një skenë të jashtëzakonshme, të lidhesha me tifozët dhe të përjetoja gjithçka që kisha ëndërruar gjithmonë.”
