Enzo Maresca po përpiqet ta mbrojë Manchester City nga faktorët e jashtëm dhe ta mbajë të lartë përqendrimin para rikthimit në aksion në Premier League. Pas ndërprerjes për ndeshjet e kombëtareve, “citizens” përballen me një ndeshje të vështirë në transfertë në “Anfield” kundër Liverpool, këtë të diel.
Tri ditë më vonë, do të jetë radha e Champions League kundër PSG. Duke folur për kanalet mediatike të klubit, Maresca nuk i anashkaloi polemikat që rrethojnë klubin, por u kërkoi të gjithëve të përqendrohen ekskluzivisht te ajo që mund të vendoset realisht në fushë.
“Personalisht, jam shumë i qetë. Klubi ka qenë shumë i qartë dhe ne kemi besim të plotë. I kuptojmë polemikat, por për ne, prioriteti është ajo që mund të kontrollojmë. Dhe ne mund të kontrollojmë vetëm aspektin futbollistik“, deklaroi trajneri italian.
“Ky qëndrim ndahet nga të gjithë në dhomën e zhveshjes. Atmosfera është fantastike. Lojtarët janë të entuziazmuar për dy ndeshjet e radhës, veçanërisht duke qenë se aktualisht jemi në krye të renditjes,” shtoi Enzo Maresca.
“Lojtarët e dinë punën e tyre dhe janë në dijeni të zhurmës mediatike, por nuk i kushtojnë shumë rëndësi asaj. Janë të përqendruar vetëm te mënyra se si mund të përballemi me Liverpool dhe se si, së bashku me tifozët, mund të përpiqemi të fitojmë në ‘Anfield’“, tha Maresca.
