Amorim i mahnitur nga talenti 19-vjeçar! Manchester United dhe Milani në garë për yllin e Sassuolos!

Një paraqitje e spikatur ndaj Milanit ka bërë që Darryl Bakola të jetë në qendër të vëmendjes së klubeve të mëdha evropiane. Mesfushori i ri i Sassuolos ka impresionuar trajnerin Ruben Amorim, i cili, sipas raportimeve, ka kërkuar që lojtari të ndiqet nga afër.

Bakola, i lindur në vitin 2007, u shpall lojtari më i mirë i ndeshjes së së dielës, duke treguar cilësi që kanë tërhequr vëmendjen e Manchester Unitedit dhe Milanit, transmeton ORAinfo.

Milan dhe Manchester United monitorojnë talentin francez

Sipas raportimeve të Calciomercato.com, paraqitja e Bakolas ka befasuar pozitivisht Ruben Amorimin. Trajneri portugez thuhet se ka kërkuar nga klubi të monitorojë zhvillimin e mesfushorit, i cili po shihet si një talent me potencial të madh për të ardhmen.

Edhe Milani është i interesuar për shërbimet e tij. Kuqezinjtë po vlerësojnë mundësinë e afrimit të një mesfushori që mund të kontribuojë si në fazën mbrojtëse, ashtu edhe në atë sulmuese.

Bakola shquhet për energjinë, lëvizjet e vazhdueshme, pasimet e sakta dhe aftësinë për të përshkuar fushën nga njëri skaj në tjetrin. Këto cilësi e bëjnë atë një profil interesant për skuadrat që kërkojnë mesfushorë modernë dhe me potencial zhvillimi.

Sassuolo kërkon dyfishin e investimit

Bakola iu bashkua Sassuolos nga Marseille në janar, për shumën prej rreth 10 milionë eurosh. Tani, klubi italian raportohet se kërkon të paktën dyfishin e kësaj shume për ta lënë të largohet.

Megjithatë, nëse mesfushori vazhdon me paraqitje të tilla, çmimi i tij mund të rritet ndjeshëm. Sipas raportimit, deri në verën e ardhshme vlera e kartonit të tij mund të kalojë shifrën e 30 milionë eurove.

Interesi i klubeve të mëdha pritet të shtohet nëse Bakola vazhdon të konfirmojë potencialin e tij në kampionatin italian. Për momentin, mbetet të shihet nëse Manchester Unitedi apo Milani do të ndërmarrin hapa konkretë për transferimin e talentit francez. /ORAinfo/