Trajneri i Arsenalit, Mikel Arteta, ka dhënë një përditësim shqetësues për gjendjen e Bukayo Sakës, i cili rrezikon të mungojë në ndeshjen e fundjavës ndaj Evertonit në Premierligë.
Sulmuesi anglez u detyrua të largohej nga fusha vetëm pas 10 minutash lojë në përballjen e së mërkurës në Ligën e Kampionëve kundër Bayern Munichut.
Saka ndjeu dhimbje në pjesën e kofshës pas një pasimi nga distanca dhe menjëherë kërkoi ndihmën e stafit mjekësor të Arsenalit. Pavarësisht trajtimit fillestar, ai nuk mundi të vazhdonte ndeshjen, duke u zëvendësuar nga Eberechi Eze.
Fillimisht, Arteta ishte shprehur i shqetësuar për gjendjen e futbollistit, duke theksuar se situata nuk dukej aspak e mirë.
“Jemi pak të shqetësuar. Kur një lojtar detyrohet të largohet nga fusha për shkak të dhimbjeve të forta, kjo nuk është kurrë një shenjë e mirë. Megjithatë, duhet të presim dhe të shohim”, kishte deklaruar Arteta.
Në konferencën për media të mbajtur të premten, Arteta bëri të ditur se klubi ende nuk e ka të qartë shkallën e lëndimit dhe se Saka do t’i nënshtrohet ekzaminimeve të tjera mjekësore.
“Ai do t’i nënshtrohet një rezonance tjetër magnetike këtë pasdite, pasi kishte mjaft lëng në zonën e prekur dhe ishte e vështirë të kuptohej shkalla e lëndimit. Na nevojiten edhe disa ekzaminime dhe mendime nga specialistët”, u shpreh Arteta.
Ai shtoi se vështirësitë e futbollistit për të ecur pa dhimbje dhe kufizimet në lëvizje janë arsye për kujdes, duke theksuar se duhet pritur vlerësimi përfundimtar mjekësor.
Mbetet të shihet nëse Saka do të jetë i gatshëm për ndeshjen ndaj Evertonit, apo nëse lëndimi do ta detyrojë të qëndrojë jashtë fushave për një periudhë më të gjatë.
