Fituesi i ri i “Topit të Artë”, Harry Kane, do të jetë të martën në “Metropolitano”, me zhgënjimin e ndeshjes së të shtunës kundër Dortmundit, ku humbi një penallti dhe goditi dy herë shtyllën. Por mbi të gjitha, sulmuesi anglez rikthehet në stadiumin ku humbi finalen e Champions League 2018-2019 me Tottenham kundër Liverpool-it (2-0).
Në një intervistë për “MARCA”, Kane deklaroi: “Besoj se nuk kam luajtur kurrë kundër Atlético Madridit. Do të jetë hera ime e parë. Ata kanë treguar sa të fortë janë. Arritën në gjysmëfinalet e Champions League sezonin e kaluar dhe kanë gjithë respektin tim. Do të jetë një ndeshje e vështirë, por jemi të përgatitur. Në ‘Metropolitano’ humba një finale të Champions-it dhe ishte një moment i vështirë. Shpresoj të rikthehem dhe të shkruaj një histori ndryshe”.
KËPUCË TË REJA TË ARTA
Për të festuar triumfin e tij, kompania “Skechers Football”, marka që sponsorizon veshjet dhe këpucët e anglezit, prezantoi të shtunën një model të ri këpucësh me detaje të arta, të cilat Kane do t’i përdorë në Madrid.
Fushata u shoqërua me filmin e shkurtër “Mark of Greatness”, që nderon arritjen sportive të sulmuesit dhe rrugëtimin e tij. Në film shfaqet një artizan misterioz, i cili kalon vite i izoluar, duke krijuar një unazë unike në punishten e tij.
Unaza e artë simbolizon një seri ekskluzive prej 73 palë këpucësh, një për çdo gol të shënuar nga Kane gjatë sezonit 2025-2026, që i sollën “Këpucën e Artë” dhe “Topin e Artë”. Megjithatë, këpucët e tij personale janë unike, të veshura me fletë ari të vërtetë 24-karatësh.
NJË PIKTURË GJIGANTE PËR HARRY KANE
Fitimi i “Topit të Artë” nga Kane ka frymëzuar edhe iniciativa të tjera. Artisti spanjoll Michel Díaz ka përfunduar një pikturë gjigante, të titulluar “Përqafimi i engjëllit”. Vepra ka përmasa 1,80 × 1,20 metra dhe është realizuar me bojë vaji dhe akrilik.
“U frymëzova të pikturoja Kane për shkak të evolucionit të tij të jashtëzakonshëm, përmes luftës dhe përqendrimit, që e shndërruan nga një futbollist i madh në një lojtar të nivelit më të lartë”, – shpjegoi Michel Díaz. Piktura do t’i dorëzohet sulmuesit së shpejti.
ESKALOPE TË ARTA PËR KAMPIONIN
Edhe Stefan Kastner, pronari i restorantit bavarez “Waldgasthof Buchenhain” në Mynih, e ka festuar suksesin e Kane. Pasi bëri një premtim në shtator, ai e mbajti fjalën dhe i dhuroi anglezit katër ‘schnitzel’, eskalope vjeneze me mish viçi, të mbuluara me ar të ngrënshëm.
Por surprizat nuk përfundojnë këtu. Kane ka edhe një sfidë të re; të shënojë 40 gola në Bundesligë gjatë këtij sezoni. Nëse ia del, Kastner premton: “Do të organizojmë një festë në kopsht për 500 persona, me birrë Hofbräu falas dhe mini-eskalope të arta për të gjithë”.
