Transferimi i Mirlind Dakut në Rusi te Rubin Kazani është vetëm çështje kohe.
Daku lë skuadrën e Osijekas, të cilës Rubin Kazani do t’i paguajë plot 1.2 milionë euro për shërbimet e futbollistit kosovar.
Gjithashtu, bëhet e ditur se Daku do të përfitojë një milionë euro në sezon. Në anën tjetër, ish-skuadra e tij, Llapi do të përfitojë plot 180 mijë euro nga shitja e Dakut, pasi që ka në zotërim 15% të kartonit të tij.
Tani, Daku si duket do të niset sot për ta finalizuar transferimin e tij në Rusi, sipas ish-trajnerit të tij, Tahir Batatina.
Batatina shkroi në “Facebook” duke thënë se nga sot fillon misioni i ri i Dakut, ndërsa u shpreh krenar që lojtarët që i ka stërvitur po shndërrohen në lojtarë milionësh.
“Sot së bashku me yllin e futbollit kosovar dhe ish yllin e skuadrës sime, Llapit, Mirlind Dakun, ishim në mengjes bashkarisht dhe isha për ta përcjellur drejt skuadrës së re ku u emocionova kur u përshendeta me të sepse kujtova ditët e para kur Lindin e transferova tek Llapi, si i besova dhe se sa shumë e mbështeta”, shkroi Batatina.
“Shumë i lumtur që si trajner arrita që lojtarët të cilët i stërvita të bëhen yje të futbollit dhe lojtar milonësh. Rruga e mbarë Lindi e sukseset mos t’u ndalshin asnjëherë”, shkroi më tej Batatina në “Facebook”.
