Kristiano Xhiuntoli bëhet përsëri objekt diskutimi te Napoli. Drejtori sportiv, vendosi të largohej nga napolitanët pasi ia doli të ndërtonte një skuadër që u shpall kampione në Itali. Presidenti De Laurentis i dha leje të largohej drejt bardhezinjve duke ndërprerë kontratën me të, por dukshëm ka qenë i pakënaqur me vendimin e ish-drejtuesit të klubit të tij që po përforcon në këtë mënyrë rivalët direkt.
Pakënaqësitë janë rritur padyshim pas deklaratave të lëshuara së fundmi nga Xhiuntoli në prezantimin e tij si drejtori i ri sportiv i Juventusit. Ai deklaroi se kishte qenë juventin që i vogël, teksa bënte 8 orë rrugë me autobus për të ndjekur ndeshjet e kësaj skuadre.
Presidenti i Napolit, është hakmarrë në mënyrën e tij ndaj kësaj “tradhtie” të Xhiuntolit, teksa u është përgjigjur gazetarëve që e ngacmuan rreth këtyre fjalëve gjatë konferencës së prezantimit të fanellave të reja të klubit kampion.
“Nuk e prisja me të vërtetë, me ka gjetur të papërgatitur. Nëse do ta kisha kuptuar më parë, do ta kisha hequr qafe më parë”, tha numri 1 i klubit të Napolit.
PANORAMASPORT.AL
