Një telenovelë e merkatos së verës po merr fund. Kajl Uoker i ka komunikuar sot Bajern Mynih se nuk do të transferohet në Gjermani, por do të vazhdojë të jetë pjesë e Mançester Sitit.
Mbrojtësi ishte tunduar nga ofertat e njëpasnjëshme të gjermanëve, të cilët e shihnin si një opsion të shkëlqyer për të përforcuar radhët e tyre me anglezin. Ky i fundit ishte në vitin e fundit të kontratës dhe kishte marrë leje nga Siti për të diskutuar me bavarezët, duke arritur deri në një akord verbal me ta.
Por në fund, Guardiola ia ka dalë t’i mbushë mendjen që të qëndrojë e për më tepër, klubi po bëhet gati t’i rinovojë kontratën, duke vazhduar bashkëpunimin me të përtej vitit 2024. Kështu, “Bild” bën të ditur se futbollisti ka lajmëruar bavarezët se nuk do të transferohet në Gjermani, duke i dhënë fund negociatave që kishin filluar në qershor.
PANORAMASPORT.AL
