Festival golash në stadiumin Luigji II në Monaco, në ndeshjen mes skuadrës vendase dhe Olimpikut të Marsejës, e mbyllur me rezultatin 3-2.
Dy herë kaloi në epërsi skuadra marsejeze, por ekipi nga Principta jo vetëm që ia doli të barazonte, por në fund festoi fitoren e katërt në shtatë javët e para, duke u ngjitur të paktën përkohësisht në krye të klasifikimit.
Ndiaye zhbllokoi takimin në favor të Marsejës pa u mbushur një minutë lojë pas pasimit të dhënë nga Aubameyang.
Akliouche ktheu ekuilibrin në rezultat në të tetën, por sërish shënuan miqtë me Gigot në minutën e 18-të.
Vetëm tri minuta më vonë, Balogun shënoi të dytin për Monacon.
Në pjesën e dytë vendësit u treguan më të kujdesshëm në fazën mbrojtëse, po cinikë në sulm. Akliouche përfitoi nga një shpërqendrim i mbrojtjes mike, duke shënuar të dytin personal dhe të tretin për Monacon në minutën e 52-të.
