Erling Haaland e quajti veten një “zombi” në fushë dhe gjithashtu foli rreth asaj nëse ai do të thyejë rekordin e golave të Alan Shearer në Ligën Premier.
Norvegjezi ka qenë në formë produktive që kur u transferua në Angli duke shënuar 44 gola në Ligën Premier në vetëm 42 paraqitje. Rekordi i tij i çmendur para portës bëri që Martin Odegaard ta quante atë një “bishë” ndërsa Jurgen Klopp e konsideroi atë si një “forcë të natyrës”.
Megjithatë, Haaland e etiketoi veten si një “zombi” në fushë, ndërsa shpjegoi varësinë e tij ndaj shënimit të golave.
“Mund të futem në fushë dhe ta prek topin disa herë, por thjesht jam duke ecur përreth, duke qëndruar aty, duke bërë lëvizje në botën time… është e vështirë të shpjegohet. Unë dal nga trupi im dhe bëhem një zombi”, ka thënë norvegjezi.
“Kur skuadra nis aksionin nga prapa, e di që nuk kam nevojë të përfshihem. Unë qëndroj aty (në sulm) dhe pres momentin e duhur”, shtoi ai.
Alan Shearer ende kryeson listën si golashënuesi më i mirë i të gjitha kohërave në Ligën Premier me 260 gola. Edhe pse Haaland aktualisht është shumë larg tij, 216 gola për të qenë të saktë, ka pasur sugjerime se ai mund të vendosë një rekord të ri nëse vazhdon karrierën e tij me Cityn edhe për disa vite të tjera.
“Sa është kontrata ime? Tre vjet e 10 muaj? Pra, ka ende kohë për ta bërë atë, apo jo?”, pyeti Haaland.
Kur u pyet nëse beson se mund ta bëjë këtë në një periudhë kaq të shkurtër, ai tha:
“Kjo është diçka që nuk mund ta mendosh. Duhet të mendosh për ndeshjen e ardhshme, sezonin dhe më pas këto gjëra vijnë pas një kohe. Por nëse do të jem për 15 vjet në Angli, atëherë pse jo? Do të shohim”, përfundoi Haaland.
Haaland do të kërkojë të shtojë numrin e golave këtë të diel, me Cityn që udhëton në “Emirates” aty ku do përballet me Arsenalin e Mikel Artetës.
