Portugalia e Kristiano Ronaldos e preu biletën e kualifikimit që javën e 6-të të kualifikueseve “Euro 2024”, pas suksesit me shifrat 3-2 përballë Sllovakisë në shtëpi.
Dueli i radhës për kampionët e Europës përgjatë “Euro 2016” do të inkuadrohen ndaj Bosnjës në transfertë, ku këta të fundit do të tentojnë të surprizojnë Ronaldon me shokë, aq me tepër kur matematika i lejon të shpresojnë për vendin e dytë, 4 pikë pas Sllovakisë, e ku janë në lojë edhe 3 ndeshje të tjera.
Pas dopietës së fundmi, golashënuesi më i mirë në historinë e përfaqësueses portugeze iu përgjigj pyetjes së gazetarëve nëse e shikon si të mundur kuotën e 1000 golave:
“E mendoj se është e vështirë, por jo e pamundur. Varet se si këmbët do të më përgjigjen. Përpara se të flasim për shifrën e 1000-të, fillimisht të mendojmë për 900 finalizime. E shikoj si arritje të mundshme, ndonëse më pëlqen t’i marr ndeshjet me radhë. Shumë gurë duhen thyer deri në atë pikë, por pse jo, çdo gjë është e mundur”, pohonte Kristiano Ronaldo, autori i 125 golave me kombëtaren luzitane në harkun e 202 prezencave.
Aktualisht sulmuesi 38-vjeçar numëron në total 857 gola (klube dhe kombëtare), çka do të thotë se atij i nevojiten edhe 43 gola për të rrumbullakosur numrin e 900 golave.
PANORAMASPORT.AL
