Kosova jonë e nisi më së miri aventurën në ligën B të “Nations League”.
“Dardanët”, kanë mposhtur Irlandën me rezultat 1-0 në “Fadil Vokrri” duke i japur këmbën e mbarë në luftën për ngritje në ligën A.
Rreth fitores së madhe ka folur edhe kryetari i FFK-së, Agim Ademi i cili dha një mesazh të fortë.
“E nisëm edicionin e ri të Ligës së Kombeve me fitore dhe me një paraqitje që dëshmon se Kombëtarja jonë është e gatshme të hapë një kapitull të ri, me besim, përkushtim dhe ambicie të reja. Pas zhgënjimit të humbjes në finalen e “play-off”-it të Botërorit 2026 ndaj Turqisë, sonte dhamë përgjigjen më të mirë në fushë: vazhdojmë përpara, më të fortë dhe më të bashkuar drejt objektivave tona të reja. Stadiumi “Fadil Vokrri” sonte ishte i veçantë. Përveç lojës së Kombëtares dhe atmosferës fantastike të krijuar nga “Dardanët”, nga tribunat dhe në fushë u përcoll edhe një mesazh i fuqishëm në mbështetje të çlirimtarëve tanë. Një mesazh që na kujton se liria jonë ka një histori, sakrificë dhe emra që nuk harrohen. Përgëzime për secilin futbollist për angazhimin, karakterin dhe përkushtimin e treguar gjatë 90 minutave. Mirënjohje për përzgjedhësin Franco Foda dhe gjithë stafin teknik për punën dhe përkushtimin e tyre. Faleminderit “Dardanëve” dhe të gjithë tifozëve që ishin sonte në “Fadil Vokrri” dhe që i dhanë zemër ekipit. Mirënjohje edhe për ekipin organizativ, institucionet e rendit dhe sigurisë dhe të gjithë ata që kontribuuan që kjo mbrëmje të përmbyllej me sukses. Sonte fituam në fushë, por fituam edhe në unitet, krenari dhe dashuri për Kosovën. LIRIA KA EMËR! PËR ÇLIRIMTARËT!”.
Kosova, ndeshjen e radhës do ta luaj të dielën ndaj Austrisë, e cila luhet në “Ernst-Happel Stadion” të Vjenës.
