Alen Sherri, i cili do të prezantohet te skuadra e Kaljarit në Serinë A, i ka dhënë lamtumirën skuadrës së Egnatias me një postim në rrjetet sociale. Dy sezone mjaft të suksesshme për portierin Sherri me skuadrën rrogozhinase, duke shprehur mirënjohjen për momentet emocionuese, ndërsa bëhet gati për një tjetër ekzperiencë, në një tjetër nivel.
Postimi i plotë i Sherrit
Nuk di nga të filloj të flas për dy vitet e kaluara. Dy vite plot miqësi, vllazëri, fitore, besim, mbështetje, humbje, trishtime, të gjitha së bashku. Sot fillon një eksperiencë e re për mua dhe doja që fillimisht ta nisja duke falënderuar pa përjashtim të gjithë ata, të cilët besuan te unë dhe më mbështetën gjatë gjithë këtij rrugëtimi në klubin EGNATIA.
Duke nisur me në krye presidentin dhe drejtorin të cilët besuan te unë në një moment të vështirë të karrierës time, me shokët e ekipit më të cilët ndamë kohën më të madhe të ditës tonë dhe kishim një grup fantastik, me tifozët të cilët ishin gjithmonë mbështetës e prezent në çdo ndeshje, me stafin e palodhur të cilët punuan shumë me mua, me mjekët e ekipit që u kujdesen për të gjithë ne, me punëtorët të cilët u kujdesën gjithmonë që çdo gjë të shkonte siç duhej. Do jem përgjithmonë mirënjohës dhe falënderues ndaj jush.
Jam shumë i lumtur për faktin që të gjithë se bashku arritëm gjëra të mëdha dhe të shkruanim histori edhe pse të paragjykuar si një qytet i vogël. Faleminderit K.F. Egnatia.
