Portieri brazilian Alisson Becker është shumë pranë largimit nga Liverpool FC dhe rikthimit në futbollin italian.
Sipas gazetarit Nicolò Schira, gardiani 33-vjeçar ka arritur marrëveshje për kushtet personale me Juventus FC, për një kontratë që pritet të zgjasë deri në verën e vitit 2029.
Aktualisht, klubi nga Torino është në negociata me Liverpoolin për finalizimin e transferimit, megjithëse drejtuesit e klubit anglez nuk kanë marrë ende një vendim përfundimtar për të ardhmen e portierit.
Alisson nuk është i panjohur me Serie A, pasi më parë ka qenë pjesë e AS Roma nga viti 2016 deri në 2018, përpara se të transferohej në Angli.
Që nga vera e vitit 2018, ai ka zhvilluar 332 ndeshje me Liverpoolin, duke mbajtur portën e paprekur në 137 prej tyre.
Gjatë periudhës së tij në “Anfield”, Alisson ka fituar UEFA Champions League, dy tituj të Premier League, UEFA Super Cup, FA Cup dhe dy herë EFL Cup.
