Karlo Ançeloti mendon se janë katër skuadra të cilat këtë vit do të luftojnë për titullin kampion në Serinë A dhe një katërshe tjetër që do i ndjekë. Trajneri i njohur italian, aktualisht në pankinën e Real Madrid, ka folur gjatë për kampionatin italian në një intervistë të dhënë për “Radio Serie A” duke u ndalur te ato që sheh ai si skuadrat të cilat do të diktojnë ritmin në këtë sezon.
“Seria A është një kampionat gjithmonë shumë i ndjekur në Spanjë, pasi ka shumë skuadra të rëndësishme. Këtu ndiqet më shumë se sa Premier Liga.
Lufta për titull? Janë katër skuadra në rresht të parë: Napoli, Milani, Interi dhe Juventusi. Pastaj në rreshtin e dytë janë Roma, Lacio, Atalanta dhe Fiorentina që do të mundohen të qëndrojnë aty pranë.
Këtë vit Juventusi, të cilin e përballëm në SHBA, me faktin që nuk ka kompeticione europiane për të zhvilluar, mund të jetë një skuadër e rrezikshme. Napoli ka bërë një ndryshim të fortë brezash, duke arritur që të blejë lojtarë të rëndësishëm, sidomos një prej sulmuesve më të fortë në Europë i cili është Osimhen. Dhe ky ndryshim radikal bëri të mundur që të fitonte titullin”, tha ndër të tjera Ançeloti.
PANORAMASPORT.AL