Skuadra e Ballkanit është rikthyer në krye të Superligës së Kosovës në futboll.
Fitorja e fundit e kampionit në fuqi, ka bërë që Ballkani të ketë 25 pikë, sa i ka edhe Drita por që ekipi nga Gjilani ka një ndeshje më pak të zhvilluar.
Të hënën, Ballkani triumfoi 1:0 në Suharekë ndaj skuadrës së Malishevës në ndeshjen e fundit të xhiros së 13-t të elitës së futbollit kosovar.
Golin e vetëm në këtë përballje, e shënoi sulmuesi Sunday Adetunji, i cili golin e realizoi në minutën e 41-të.
Për Ballkanin, kjo është ndeshja e shtatë rresht pa humbje, ku ka regjistruar 4 fitore dhe 3 barazime.
Në anën tjetër, Malisheva që shënoi humbjen e parë pas tri ndeshjeve, mbetet në pozitën e tretë në tabelë me 22 pikë të tubuara.
Superliga e Kosovës në futboll, rikthehet pas dy javësh me ndeshjet e xhiros së 14-të.
