Numri një i stolit blaugrana, Hansi Flik, është zgjedhur trajneri më i mirë në kampionatin spanjoll për tetorin, një çmim i përmuajshëm i dhënë nga La Liga së bashku me “Microsoft”.
Barcelona ka mbyllur një muaj perfekt në të cilin ka fituar çdo takim të luajtur. Nëntë pikë nga 9 të mundshme të arritura nga Barcelona në tetor i kanë lejuar atyre të rrisin avantazhin e tyre në krye të renditjes në gjashtë pikë ndaj Realit të Madridit, pikërisht skuadrën që mundën 4- 0 në “El Clasico” e fundit të shtunën e kaluar.
Në dy ndeshjet e tjera në tetor, Barcelona mundi Alaveshin 3-0 jashtë fushe dhe Seviljen 5-1 në “Montjuiç”. Ky është çmimi i dytë për trajnerin e muajit këtë sezon për Hansi Flik. Gjermani e fitoi këtë çmim në gusht, ku regjistroi një tjetër muaj vetëm me fitore.
Në garën për trajnerin më të mirë të tetorit, Flik mundi Karlo Ançelotin (Real Madrid) dhe Imanol Alguasil (Real Sociedad).
PANORAMASPORT.AL
