Avokatët e Erion Veliajt janë gjobitur me nga 10 mijë lekë të reja, pasi munguan në seancën e fundit në Gjykatën e Posaçme, në kuadër të bojkotit të nisur nga avokatët kundër rregullores së re të GJKKO-së.
Gjyqtarja Elsa Ulliri pezulloi edhe afatet e paraburgimit për krye bashkiakun e Tiranës, i cili është i vetmi person nën masën e arrestit në burg në dosjen ndaj tij.
Bojkoti ka sjellë ndërprerjen e një sërë procesesh në GJKKO, përfshirë edhe atë ndaj ish-ministrit të Shëndetësisë, Ilir Beqaj, i cili këtë të martë u paraqit në gjykatë për dosjen e Sterilizimit.
Beqaj po gjykohet për akuzat e vjedhjes duke shpërdoruar detyrën dhe të grupit të strukturuar kriminal.
Ndërkohë, Ilir Beqaj ndodhet nën masën e arrestit në shtëpi për dosjen SASPAC, pas përfundimit të afateve të paraburgimit.
Bojkoti i avokatëve ka vijuar prej 9 shtatorit, duke sjellë shtyrjen e seancave dhe pezullimin e afateve të paraburgimit në disa prej proceseve të GJKKO-së.
Gazetare: Lusi Pergjegji
/rtsh.al/
