Kombëtarja e Brazilit ka marrë një tjetër goditje të rëndë para Kupës së Botës 2026 , pasi talenti brazilian Estêvão Willian nuk do të luajë në turne për shkak të një dëmtimi serioz.
Sipas ESPN, sulmuesi i ri i Chelsea FC nuk është përfshirë as në listën paraprake prej 55 lojtarësh që trajneri Carlo Ancelotti ka dërguar në FIFA.
19-vjeçari pësoi dëmtim në muskulin e kofshës së djathtë më 18 prill, gjatë humbjes së Chelseat ndaj Manchester United. Edhe pse fillimisht kishte shpresa për rikuperim, stafet mjekësore të Brazilit dhe klubit anglez nuk mund të garantonin se ai do të ishte gati në kohë për Botërorin.
Para lëndimit, Estêvão konsiderohej si një nga emrat e sigurt për Kupën e Botës, sidomos pasi Ancelotti vlerësonte shumë cilësitë e tij.
Problemet për Brazilin nuk ndalen me kaq. Për shkak të dëmtimeve serioze, Ancelotti nuk mund të llogarisë as në dyshen e Real Madrid, Éder Militão dhe Rodrygo, të cilët priteshin të kishin rol të rëndësishëm në ekip.
Sipas burimeve pranë kombëtares, vetë Estêvão e kishte kuptuar se shanset për të luajtur ishin shumë të vogla dhe mbeti i zhgënjyer kur u rikthye te Palmeiras për të vazhduar rehabilitimin.
Ndërkohë, tifozët brazilianë kanë pritur mirë rikthimin e mundshëm të Neymar në listën e zgjeruar të ekipit kombëtar. Golashënuesi më i mirë në historinë e Brazilit me 79 gola është një nga emrat që Ancelotti po shqyrton për listën finale prej 26 lojtarësh.
Megjithatë, mungesa e disa prej yjeve kryesorë mbetet një goditje e madhe për Brazilin në synimin për ta rikthyer titullin e botës, të cilin e pret që nga viti 2002.
