Al Itihadi triumfoi me rezultatin 3-0, në duelin ndaj Al Ain ku bëri debutimin edhe futbollisti i Kombëtares shqiptare, Mario Mitaj, i cili u aktivizua në rolin e mesfushorit të qendrës, një pozicion ky që e kemi parë shpesh edhe te Lokomotiva e Moskës.
Kjo ndeshje ishte e vlefshme për Kupën e Arabisë, me Ittihad që kaloi fazën e 1/16-ve.
Mitaj, mbrojtësi i Kombëtares shqiptare ishte një nga më të mirët në fushën e lojës. Ai ishte titullar dhe qëndroi në fushën e lojës deri në minutën e 71’, kur u zëvendësua nga mesfushori Aouar. Ndërsa, nota e Mitajt për këtë sfidë ishte 7.2.
Nëpërmjet rrjeteve sociale Mitaj ka reaguar mbi debutimin e tij me ekipin arab.
“Shumë i lumtur me debutimin tim dhe fitoren e ekipit. Atmosferë e këndshme nga tifozët tanë. Le të shkojmë tigra”, shkruan Mitaj në profilin e tij në rrjetin social Instagram.
