Lazio i Maurizio Sarrit u rikthye te fitorja pas dy humbjesh radhazi, mes tyre edhe ajo në derbi, duke mposhtur me rezultatin 3-0 Genoan në Marassi, në ndeshjen e fundit të javës së pestë të Serie A.
Bardhekaltrit shfrytëzuan dobësitë e mëdha të mbrojtjes së skuadrës së Vieira-së dhe e zhbllokuan sfidën që në minutat e para me një goditje të fuqishme të Cancellieri-t. Avantazhi u dyfishua në minutën e 30-të nga Castellanos, duke e bërë edhe më të vështirë misionin e vendasve.
Në fillim të pjesës së dytë, pas një penalltie fillimisht të akorduar e më pas të anuluar për Genoan, ishte Zaccagni ai që vulosi rezultatin final 3-0, duke i dhënë fund çdo dileme.
Me këtë fitore Lazio ngjitet ngadalë në tabelë, duke marrë frymë pas periudhës së vështirë, ndërsa Genoa mbetet e zhytur në zonën e rrezikut për mbijetesë.
