Skuadra e Gjilanit e ka nisur sezonin 2025/26 në Superligën e Kosovës në futboll, me barazim edhe pse ishte në epërsi ndaj Ballkanit.
Në xhiron e parë, Gjilani ka barazuar në shtëpi kundër Ballkanit, përkundër që synonte sezonin ta fillonte me fitore.
Të hënën, në duelin e luajtur në Gjilan, skuadrat luajtën 1:1, ku një gol u shënua në pjesën e parë dhe një tjetër në të dytën.
Rezultati u zhbllokua në minutën e 29-të me anë të Almir Aganspahiq, i cili e kaloi në epërsi Gjilanin me golin e shënuar nga penalltia.
Megjithatë, Ballkani u kundërpërgjigj në pjesën e dytë nëpërmjet Marsel Ismailgecit, i cili shënoi gol fantastik në minutën e 66-të.
Përkundër tentimeve të dyja skuadrave deri në fund të takimit për të shënuar golin e fitores, ndeshja përfundoi baras ku si Gjilani ashtu edhe Ballkani e morën nga një pikë në ndeshjen e parë të sezonit të ri, i cili nisi në dielën.
Me këtë përballje, edhe u mbyll xhiroja e parë e sezonit të ri në Superligën e Kosovës, ku u arritën këto rezultate: Dukagjini – Prishtina 2:3, Ferizaj – Drita 1:0, Malisheva – Prishtina e Re 0:4 dhe Drenica – Llapi 0:0.
