Tek Interi shpresonin që Lautaro Martinez këtë herë të qëndronte në Milano për të gjetur formën e duhur për vazhdimësinë e sezonit, por “El Toro” nuk është nga ata që bën “finte”.
Kapiteni zikaltër i është përgjigjur pozitivisht ftesës së trajnerit Lionel Scaloni për të qenë prezent me kombëtaren e Argjentinës në dy ndeshjet eliminatore, që këta të fundit do të luajnë kundër Kilit dhe Kolumbisë. Janë 2 sfida të vlefshme për eliminatoret e Botërorit dhe sigurisht që heroi i Kupës së Amerikës nuk mund ta braktiste ekipin në këtë moment.
Shumë gazetarë e kanë pritur në aeroport dhe janë interesuar për gjendjen e tij. “Çdo grumbullim për mua është special. Unë dua që ta shijoj çdo moment me kombëtaren dhe si gjithmonë jap maksimumin në fushën e lojës. Kjo fanellë do të thotë shumë për mua dhe sa herë që e vesh ndiej një krenari të madhe. Jam shumë mirë fizikisht, nuk kam asnjë problem”, ka thënë Lautaro./panorama
