Interi mori një fitore të madhe në transfertë ndaj Bayern Munih, duke triumfuar 2-1 në ndeshjen e parë çerekfinale të Champions League.
Një paraqitje e shkëlqyer e zikaltërve në “Allianz Arena”, që u vlerësua shumë edhe nga trajneri Simone Inzaghi.
“Djemtë meritojnë shumë komplimente, jo vetëm për rezultatin, por për lojën që bëmë. Luajtëm me personalitet dhe guxim ndaj një ekipi shumë të fortë,” u shpreh Inzaghi për “Sky Sport”.
Trajneri theksoi rëndësinë e qëndrueshmërisë në ndeshjen e kthimit në “San Siro”, duke lavdëruar edhe reagimin e ekipit pas barazimit të Bayernit. Goli i fitores në minutën e 91-të sipas tij pasqyron qartë mentalitetin fitues të Interit këtë sezon.
“Besuam deri në fund dhe dhamë maksimumin. Ishte një nga fitoret më të bukura, por duhet të ruajmë të njëjtin nivel edhe në ndeshjen e kthimit,” përfundoi Inzaghi.
