Gjykata e Apelit në Milano ka konfirmuar dënimin e Fabrizio Corona-s për shpifje të rëndë ndaj Wanda Nara-s, ish-bashkëshortit të saj Mauro Icardi dhe mesfushorit kroat Marcelo Brozovic. Vendimi u dha pas procesit të nisur nga paditë e ngritura ndaj ish-“mbretit të paparacëve”, i cili në vitin 2019 kishte publikuar në portalin e tij “King Corona Magazine” një artikull me titullin: “Mauro Icardi ndahet nga gruaja e tij – Wanda Nara ka tradhtuar partnerin me Marcelo Brozovic”.
Në shkallën e parë, gjyqtarja Angela Scalise e kishte dënuar Corona-n me një gjobë prej 1500 eurosh dhe me detyrimin për të dëmshpërblyer palët e prekura: 7500 euro për secilin, Wanda Nara dhe Mauro Icardi, si dhe 5000 euro për Brozovic-in. Dëmshpërblimet e menjëhershme u konsideruan të ekzekutueshme, ndërsa vlera e plotë e dëmeve jopasurore do të përcaktohet në një proces civil të veçantë.
Fillimisht, Prokuroria kishte kërkuar arkivimin e çështjes, por avokati i Brozovic-it, Danilo Buongiorno, kundërshtoi këtë vendim, duke çuar çështjen deri në gjykim. Pas verdiktit të parë në shkurt 2024, sot edhe në Apel është konfirmuar fajësia e Corona-s, në përputhje me kërkesën e Prokurorisë së Përgjithshme të Milanos.
Ky vendim mbyll një kapitull të gjatë gjyqësor, duke riafirmuar se spekulimet dhe lajmet e rreme me natyrë denigruese kanë pasoja të rënda ligjore.
