Klubi i hendbollit Kastrioti ka bërë një hap të rëndësishëm drejt shpalljes kampion i Kosovës në konkurrencën e meshkujve, duke triumfuar ndaj Rahovecit me rezultat 37:31 në finalen e parë të playoff-it.
Takimi u zhvillua të mërkurën në arenën “Bill Clinton” në Ferizaj, para rreth 2000 tifozëve, të cilët krijuan një atmosferë të zjarrtë në mbështetje të skuadrës vendase. Fillimi i ndeshjes ishte i baraspeshuar, me të dy skuadrat që zhvilluan lojë të fortë gjatë dhjetë minutave të para.
Megjithatë, Kastrioti më pas mori kontrollin e plotë të takimit, duke realizuar një seri prej 7:0 dhe duke arritur epërsi të rëndësishme 15:9. Më vonë rezultati shkoi edhe në 17:10. Rahoveci provoi të rikthehej në lojë, por ferizajasit ruajtën avantazhin dhe menaxhuan ndeshjen deri në fund për të siguruar fitoren e parë në serinë finale.
Më efikasi te Kastrioti ishte Jeton Bislimi me tetë gola, ndërsa Festim Mustafa dhe Albin Ahli shtuan nga gjashtë gola secili. Portieri Wadi Chebbi u dallua me pritje vendimtare gjatë gjithë ndeshjes.
Te Rahoveci u veçua Egzon Gjuka me shtatë gola, ndërsa Ardit Tafilaj, Mali Luzha dhe Guilherme Fernandes realizuan nga pesë gola secili.
Finalja e dytë e playoff-it zhvillohet të shtunën në Rahovec, ku Kastrioti synon fitoren e radhës për t’u afruar edhe më shumë titullit kampion
