Kombëtarja e Kosovës ka zhvilluar sot stërvitjen e radhës në kuadër të përgatitjeve për ndeshjen e nesërme ndaj Austrisë, që do të zhvillohet në Vjenë.
Në seancën e sotme stërvitore, Albian Hajdari dhe Edon Zhegrova janë stërvitur të diferencuar nga pjesa tjetër e skuadrës. Dy futbollistët kanë zhvilluar vrapime të lehta për shkak të shqetësimeve të pësuara në ndeshjen e kaluar.
Ndërkohë, pjesa tjetër e futbollistëve ka zhvilluar stërvitjen me intensitet të plotë, duke u përgatitur për sfidën e radhës.
Përzgjedhësi Franco Foda dhe stafi i tij kanë punuar kryesisht në aspektin taktik, duke u fokusuar në detajet e planit të lojës dhe mënyrën se si Dardanët do ta përballojnë Austrinë.
Kosova tashmë është e fokusuar te sfida e nesërme ndaj Austrisë, me synimin për të dhënë maksimumin në Vjenë. Ndeshja nis në orën 18:00.
