Nga Ruben Avxhiu
Në vitin 2004, Pishtarin e Olimpiadës Botërore, që sipas traditës udhëton në të gjitha kontinentet përpara se të përfundojë në qytetin organizator, gjatë një segmenti në Manhattan u mbajt nga Donald Trump.
Kandidati i sotëm për president nuk kishte hyrë ende në politikë në atë kohë, ishte demokrat liberal, manjat ndërtesash qiellgërvishtëse, pronar kazinosh dhe personazh spektaklesh televizive.
New York City ishte qyteti i radhës, në një udhëtim të gjatë që nisi në Sydney, Australi, ku ishte mbajtur Olimpiada e vitit 2000, për në Athinë të Greqisë, ku u mbajt ajo e vitit 2004.
Në New York, Pishtari kaloi në të pesë lagjet e mëdha, duke nisur nga Athens Square Park, në Astoria, Queens. Gjatë rrugës, ai u mbajt nga sportistë të njohur amerikanë e figura të njohura të Qytetit. Në Manhattan, në një pjesë të itinerarit u mbajt nga Donald Trump.
