“Kjo pauzë kaq e gjatë për ndeshjet ndërkombëtare nuk ka asnjë kuptim. Edhe trajneri Hansi Flick më tha të njëjtën gjë pak ditë më parë. Katër ndeshje në tre javë përbëjnë një ndërprerje që na dëmton drejtpërdrejt dhe na e prish plotësisht ritmin.”
Me këto fjalë të ashpra, presidenti i Barcelonës, Joan Laporta, ndezi një debat lidhur me kalendarin e hartuar nga organet drejtuese të futbollit ndërkombëtar, një kalendar që konsiderohet tepër i ngjeshur dhe i rrezikshëm për shëndetin e sportistëve.
Drejtuesi i klubit “blaugrana” shkoi edhe më tej, duke kritikuar shtimin e vazhdueshëm të kompeticioneve: “Përveç Kupës së Botës dhe Kampionatit Evropian, tani kemi edhe Ligën e Kombeve; thjesht ka shumë turne dhe ndeshje”.“Kalendari është i mbingarkuar dhe çmimin më të lartë e paguajnë lojtarët, ndërkohë që qëllimi ynë i vetëm është që ata të fitojnë trofe duke mbajtur veshur fanellën e Barcelonës”, shtoi më tej Laporta.
“Na ndodhi edhe vitin e kaluar me Raphinha: ai ishte në formë të shkëlqyer kur u largua, por më pas mes udhëtimeve të vazhdueshme dhe kalendarit të ngjeshur u dëmtua. Planifikojmë të flasim drejtpërdrejt me UEFA dhe FIFA, në mënyrë që kjo situatë të zgjidhet njëherë e mirë”, tha Laporta.
