Këtë vikend në program do të jetë xhiroja e tretë e Superligës në futboll.
Në orar do të jenë vetëm katër ndeshje, dy të shtunën e dy të dielën, derisa derbi mes Dritës e Ballkanit është shtyrë për një kohë tjetër, për shkak të angazhimit të suharekasve në garat evropiane.
Java hapet të shtunën me ndeshjen mes Prishtinës e Malishevës, që njëherësh do të jetë më interesantja e javës.
Kryeqytetasit kanë katër pikë nga dy ndeshje, derisa malishevasit janë në super formë me pikë të plota e me shtat gola të shënuara e vetëm një i pësuar. Xhiron e kaluar, Prishtina befasisht barazoi ndaj Gjilanit që luajti me junior, derisa Malisheva shkatërroi Fushë Kosovën.
Të shtunën përballen Feronikeli 74 e Gjilani. Të dy ekipet hyjnë në takim për të kërkuar fitoren e parë kampionale.
Nikli ka pësuar dy herë, derisa të kuqtë nga Gjilani kanë një barazim.
Pa pikë në këto dy xhiro është edhe Fushë Kosova që si vendas e pret Llapin, të dielën. Llapjanët javën e kaluar morën fitoren e parë në kampionat, pasi e nisën me humbje.
Të dielën, Dukagjini kërkon pikët e para ndaj Lirisë së Prizrenit. Klinasit kanë dy humbje rresht, e prizrenasit një humbje e një barazim, atë ndaj Dritës xhiron që e lamë pas.
Pra, përballja mes Dritës e Ballkanit, e paraparë që luhet këtë vikend është shtyrë nga Komisioni i Garave i FFK-së. Të gjitha ndeshjet e javës së tretë luhet nga ora 16:00.
