Trajneri i Manchester City, Enzo Maresca, ka dalë në mbrojtje të portierit Gianluigi Donnarumma dhe mbrojtësit Marc Guehi, pas kritikave të bëra ndaj formës së tyre. Skuadra e “qytetarëve” përgatitet për ndeshjen ndaj Brighton në Premier League, pak ditë pas përballjes që dy ekipet patën në Carabao Cup (City fitoi me penallti).
Donnarumma ishte vënë nën lupë edhe më herët gjatë këtij sezoni, veçanërisht për lojën e tij me këmbë, e cila është konsideruar si një pikë shqetësuese. Maresca u shpreh: “Që kur kemi filluar, Gigio po paraqitet mirë. Si çdo lojtar apo trajner, ndonjëherë ai bën gabime, por kjo është pjesë e sezonit.”
“Ata luajnë kaq shumë ndeshje dhe minuta, saqë ndonjëherë është e pamundur të mos bësh ndonjë gabim. Ai është djalë mjaft i fortë. Ai e di kur bën gabime. Nuk ka nevojë t’ia themi ne. Ndonjëherë është aq e qartë, saqë e kuptojnë vetë. Është pjesë e lojës”, tha trajneri italian.
Edhe Guehi u përball me kritika të ashpra pas një paraqitjeje të dobët kundër Ipsëich, ku u la pas në shpejtësi në aksionin që çoi te njëri prej golave, e më pas shkaktoi edhe një penallti. Maresca tha: “Jam plotësisht i kënaqur me Marc sepse mënyra se si ai reagon është fantastike.”
“Ai është djalë i shkëlqyer, një nga kapitenët, një lider; sinqerisht, kam shumë konsideratë për Marc. Ashtu si Gigio, edhe ai e kupton kur bën gabime. Ai ka luajtur pothuajse çdo minutë që nga fillimi i sezonit, kështu që gjithçka është në rregull me të”, deklaroi trajneri i “citizens”.
