“Dua që Chelsea im të arrijë sa më shpejt të jetë e mundur në nivelin e Manchester Cityt“, ngulmon Enzo Maresca.
Trajneri italian është ambicioz dhe kërkon t’u japë fund oshilacioneve dhe kaosit te “Blutë e Londrës”.
Që pavarësisht investimeve pafund në merkato gjatë viteve të fundit nuk kanë arritur të shfaqen konkurrues dhe fitues si më parë.
“Çdo trajner ka nevojë për kohë për të përshtatur idetë e tij tek ekipi”, thekson ish-mesfushori, i cili ka punuar edhe si ndihmës i Pep Guardiolës.
Dhe pikërisht teknikun katalanas të Citizens e ka si frymëzim, shembull suksesi dhe modelin që kërkon të ndjekë.
“Të gjithë po shohin me kuriozitet qarkullimin tonë të topit dhe ndërtimin e lojës nga pas.
Kam parë shumë ndeshje të Chelseat gjatë sezonit të kaluar. Dhe asnjëherë nuk vura re ekipin të bënte presing lart…
Të gjithë prisnin në gjysmëfushën e tyre dhe lejonin kundërshtarët të organizoheshin.
Tani është ndryshe, ne kemi vendosur të markojmë një kundër një, sepse duam të jemi agresivë.
Ky është një ndryshim i madh, por jemi në rrugën e duhur. Po punojmë shumë mirë.
City dhe Arsenali kanë dominuar në Premier League për faktin që Guardiola (8) dhe Arteta (5) kanë nga shumë vite në skuadër“, thekson Maresca.
