“Dje ishte ndeshja ime e fundit dhe tashmë më mungon veshja e fanellës ‘albiceleste’. E di që po marr vendimin e duhur. Ka qenë një rrugëtim i jashtëzakonshëm, plot gëzim e pak trishtim, por e di që çdo hap që hodha ia vlente.”
Kështu e nis Leo Messi mesazhin e tij në rrjetet sociale drejtuar popullit argjentinas pas lamtumirës nga kombëtarja. “Dhe ka ende kaq shumë për të thënë,” shtoi ai.
“Është e pamundur për mua të shpreh gjithçka që ndiej me fjalë apo në një postim të vetëm. Ky rrugëtim do të kishte qenë i pamundur pa familjen time, e cila ka qëndruar gjithmonë pranë meje dhe më ka mbështetur, veçanërisht në momentet e vështira kur kisha më shumë nevojë”, tha Messi.
Më tej, ai shtoi: “Miqtë e mi, si dhe të gjithë shokët e skuadrës e trajnerët që kam pasur, ishin thelbësorë. Nuk dua ta harroj Diego, i cili e çoi vendin tonë aty ku e meritonte dhe na ndihmoi duke qenë me ne, madje edhe nga qielli, në çdo hap që hodhëm.”
“Falënderoj klubet për të cilat kam luajtur, që gjithmonë i kanë respektuar ndjenjat e mia dhe më kanë lejuar t’i përkushtohem vendit tonë sa herë që bëhej fjalë për të veshur fanellën e kombëtares”, tha ai.
“Sigurisht, faleminderit Zotit: pa udhëzimin dhe vullnetin e Tij, nuk do të guxonim as të ëndërronim se do të arrinim kaq larg. Ju dua shumë të gjithëve; do të më mungoni dhe do t’ju jem gjithmonë mirënjohës që qëndruat pranë nesh, pranë meje“, përfundoi Messi.
