Zhoze Murinjo po planifikon një rikthim të bujshëm në Premier Ligë. Lajmin e bën të ditur “Daily Mail” që ka zbuluar se tashmë trajneri portugez është gati të pranojë një ofertë të mëdësishme nga ish-klubi i tij, Mançester Junajtid.
Burime pranë portugezit i cili u shkarkua pak javë më parë nga Roma, kanë zbuluar për tabloidin britanik se ai mendon se ka ende “hesape të hapura” te ”djajtë e kuq” dhe është gati të punojë me klubin nga i cili u largua në dhjetorin e vitit 2018 në mënyrë jo edhe aq miqësore.
Murinjo raportohet se ka dëshirë të punojë me drejtuesit e ri të klubit anglez, pasi Xhim Retklif dhe kompania e tij INEOS kanë marrë përsipër të mbikëqyrin transferimet dhe sektorin teknik të klubit ku blenë 25% të aksioneve nga familja Glejzër. “Ambicia e tij është të kthehet te Junajtid. E ka kthyer në një mision personal atë të kthimit në klub”, shpjegoi një mik i Murinjos për tabloidin britanik.
Murinjo mori drejtimin e Mançester Junajtid në vitin 2016 dhe siguroi me këtë klub trofeun e Ligës së Europës, ashtu si dhe Kupën e Ligës. Një vit më vonë, ai arriti të mbyllte kampionatin në vendin e dytë, pas krahëve të Mançester Sitit.
PANORAMASPORT.AL
