Futbolli modern sa vjen e bëhet më i fortë, aq më shumë kur bëhet fjalë në Premier Ligën angleze, ku kontaktet e ashpra, por edhe marzhi i kartonëve që jepen për lojën e ashpër, ka një tjetër standard kundrejt atij të pjesës tjetër të Europës.
Kështu që çfarë nevojitet që t’i shpëtosh sa më shumë goditjeve dhe përplasjeve të rivaleve? Pa dyshim që të vraposh sa më shpejt të jetë e mundur dhe tabloidi prestigjioz, “The Sun”, ka bërë dje një kërkim lidhur me lojtarët më të shpejtë, deri në këtë pjesë të sezonit të kampionatit anglez, madje duke ndërtuar edhe formacionin e “sprinterëve” të Premier Ligës, në mes të të cilëve kanë gjetur edhe portierin me këmbët më të shpejta. Lojtari më i pakapshëm deri tani është sulmuesi i Lutonit, Çiedozie Ogbene, i cili ka regjistruar shpejtësinë 36.93 kilometra në orë.
Thuajse në të njëjtën shifra edhe anësori ofensiv Pedro Neto i Uolvesit 36.83 kilometra në orë, ndërsa repartin ofensiv e kompleton Entoni Gordon i Njukasëllit me 36.68 kilometra në orë. Për sa i përket mesfushës, lojtari më i shpejtë është ylli i Liverpulit Dominik Sobozhlai me 36.8 kilometra në orë. Ndërkohë, në mbrojtje vrapon më shpejt se kushdo Dara O’Shi i Bërnelt me 36.73 kilometra në orë, ndërsa portieri i Çelsit, Robert Sançez, ka regjistruar 35.11 kilometra në orë.
PANORAMASPORT.AL