Me katër futbollistë premtues nga shkolla e futbollit, skuadra e Prishtinës ka firmosur kontrata profesionale.
Reis Paci, Lorik Mehmeti, Lorian Fazliu dhe Skifter Mustafa, janë futbollistët e rinj që Prishtina i ka prezantuar të mërkurën.
Paci, Fazliu e Mustafa janë të lindur në vitin 2007, ndërsa Mehmeti është i vitit 2008 dhe të gjithë janë pjesë e ekipit U19 të Prishtinës kurse herë pas herë grumbullohen edhe me ekipin e parë.
Me këtë veprim, skuadra nga kryeqyteti po dëshmon se prioritet ka zhvillimin e futbollistëve të rinj dhe promovimin e tyre nga shkolla e futbollit, gjë që shihet shumë e rëndësishme për futbollin e Kosovës.
“Ky hap i klubit tregon qartë se FC Prishtina ka si një nga qëllimet kryesore, zhvillimin dhe promovimin e lojtarëve të rinj, të cilët mund të kontribuojnë jo vetëm për ekipin e parë por edhe për Kombëtaren e Kosovës”, ka shkruar Prishtina në njoftim.
Prishtina këtë sezon ka disa lojtarë të talentuar dhe tejet premtues në ekipin e parë, ndërsa aktualisht është lidere e Superligës.
