Ish-trajneri legjendar i Milanit, Arrigo Saki, njeriu që me futbollin dhe metodat e tij revolucionoi historinë e lojës dhe të vetë klubit kuqezi, sot, me një ton të lehtë trishtimi, përpiqet të flasë për “Djallin” e plagosur që po mbyll një sezon të dështuar.
Mbyllje që, sipas tij, u vulos nga paraqitja e dobët në finalen e Kupës së Italisë të humbur ndaj Bolonjës. Saki ka ndarë mendimet e tij për Milanin, në një shkrim të publikuar nga “La Gazzetta dello Sport”. “Zgjedhja e trajnerit është themelore, sepse ai duhet të jetë në përputhje me programet e klubit.
Milani, në vend të kësaj, fillimisht mendoi të merrte Lopetegin, dhe më pas, kur tifozët u zemëruan sepse ai nuk ishte në nivelin e klubit, kaluan te portugezi Fonseka.
Drejtuesit që morën këtë vendim bënë një gabim të rëndë dhe në mes të sezonit vendosën ta tërhiqnin atë vendim dhe t’ia jepnin pankinën Konseisaos, i cili është më pak fajtor nga të gjithë sepse u gjend duke punuar në një kaos të përgjithshëm. Në fund, do të jetë pikërisht ai që do ta pësojë.
Por si mund të rregullohen gjërat nëse në krye janë gjithmonë të njëjtët njerëz që gabuan që në fillim të sezonit?”.
PANORAMASPORT.AL
